عمران خان کي مشورو آهي ته هو اليڪشن ڪميشن ۾ پيش ٿئي: خورشيد شاهه


 خميس ۱۲ آڪٽوبر ۲۰۱۷    ۱ ھفتو پھريان     ۴۵   اسلام آباد   پرنٽ ڪيو
خورشيد شاهه

رپورٽ :   ويب ڊيسڪ  : اسلام آباد: قومي اسيمبلي ۾ مخالف ڌر اڳواڻ سيد خورشيد احمد شاهه چيو آهي ته پبلڪ اڪائونٽس ڪميٽي ذميداري سان ڪم ڪري رهي آهي، اسان تقريبن ۲ ارب روپين جون وصوليون به ڪيون آهن، جيڪو پارليامينٽ ۾ نٿو اچي ان جي باري ۾ ماڻهن کي فيصلو ڪرڻ گهرجي ۽ ان کي ووٽ نه ڏيڻ گهرجي، عمران خان کي منهنجو مشورو آهي ته اڄ ئي اليڪشن ڪميشن ۾ پيش ٿي وڃي. اهڙن خيالن جو اظهار هن خميس ڏينهن پارليامينٽ هائوس ۾ پبلڪ اڪائونٽس ڪميٽي جي اجلاس کانپوءِ ميڊيا سان ڳالهائيندي ڪيو. هن چيو ته اسان اربين روپين جي ڪرپشن تي ڳالهه ڪريون ٿا، هتي ماڻهن کي صرف پيئڻ جو صاف پاڻي نٿو ملي، هي سسٽم تمام پراڻو هلندو پيو اچي پر شڪر آهي جو گهڻيون شيون پڪڙيون به وينديون آهن، پر انهن جي ذميدارن جو تعين ٿيڻ گهرجي، هن چيو ته عمران خان کي منهنجو مشورو آهي ته اڄ ئي اليڪشن ڪميشن ۾ پيش ٿي وڃي، هي نه ٿئي جو ڪو پوليس جو جوان کيس پڪڙي اليڪشن ڪميشن جي سامهون بيهاري، بهتر آهي ته هو وڃي ۽ ٻڌائي ته مون کي ادارن جو احترام آهي، هن چيو ته هي ايوان اسان جو محور آهي، ماڻهن کي فيصلو ڪرڻ گهرجي ته جيڪو پارليامينٽ ۾ نٿو اچي ان کي ووٽ نه ڏيڻ گهرجي.