جامشورو: جامعہ سندھ میں 75 طلباء میں 26 لاکھ روپے کے اسکالرشپس کے چیک تقسیم


 پير ۲۰ مارچ ۲۰۱۷    ۳ ماہ پہلے     ۱۵۲     جامشورو   پرنٹ نکالیں
جامعہ سندھ میں 75 طلباء میں 26 لاکھ روپے کے اسکالرشپس کے چیک تقسیم

رپورٹ    علی مراد چانڈیو   :جامشورو: جامعہ سندھ میں 75 طلباء میں 26 لاکھ روپے کے اسکالرشپس کے چیک تقسیم، وی سی کی جانب سے مزید طلباء کی مالی معاونت کا اعلان جامعہ سندھ جامشورو میں ہائیر ایجوکیشن کمیشن کی ’’اہلیت و ضرورت‘‘ اسکیم کے تحت 42 اور ڈسٹرکٹ میرٹ اسکالر شپ کے تحت 33 طلباء کو اہلیت و ضرورت کی بنیاد پر 26 لاکھ روپے کے اسکالر شپ کے چیک دیئے گئے۔ وائس چانسلر سیکریٹریٹ کے سینیٹ ہال میں منعقدہ تقریب میں شیخ الجامعہ سندھ پروفیسر ڈاکٹر فتح محمد برفت نے مجموعی طور پر 75 طلباء میں چیک تقسیم کیے۔ طلباء کے مالی معاونت کے شعبے کے ڈائریکٹر ڈاکٹر حاکم علی مہیسر کی جانب سے منعقد کی گئی تقریب میں ہائیر ایجوکیشن کمیشن کی ’’اہلیت و ضرورت‘‘ اسکیم کے تحت 42 طلباء کو فی کس 48 ہزار وپے کے چیک دیئے گئے، جبکہ ڈسٹرکٹ میرٹ اسکالر شپ کے تحت 33 طلباء کو فی کس 18 ہزار روپے کے چیک دیئے گئے۔ اس موقع پر وائس چانسلر پروفیسر ڈاکٹر فتح محمد برفت نے طلباء کو مدد ، تعاون و سرپرستی کا یقین دلاتے ہوئے کہا کہ جامعہ سندھ کو تعلیم و تحقیق کا اعلیٰ مرکز بنایا جائے گا۔ جبکہ کوشش کی جا رہی ہے کہ طلباء کو ہر ممکن سہولیات فراہم کی جائیں۔ انہوں نے کہا کہ جامعہ سندھ کے طلباء کو لیپ ٹاپ اور فی واپسی کے چیک دیئے گئے ہیں، باقی ماندہ طلباء کو بھی لیپ ٹاپ و اسکالر شپ دلوانے کی کوشش کریں گے۔ انہوں نے کہا کہا ماضی میں جامعہ سندھ کو انتہائی کم اسکالر شپس مل رہی تھیں، جس پر جامعہ سندھ کی انتظامیہ نے ایچ ای سی حکام پر زور دیا ہے کہ جامعہ سندھ کے غریب طلباء کی بھی مدد کی جائے۔ انہوں نے طلباء پر زور دیا کہ وہ جامعہ کو اپنا سمجھیں اور خوب محنت کریں۔ تقریب میں اسٹوڈنٹس فنانشنل ایڈ کی ڈائریکٹر ڈاکٹر حاکم علی مہیسر نے مہمانوں کا شکریہ ادا کیا۔ تقریب میں ٹھٹھہ کیمپس کے پرو وائس چانسلر پروفیسر ڈاکٹر سرفراز حسین سولنگی، دادو کیمپس کے پی وی سی ڈاکٹر انور علی شاہ جی سید، میرپورخاص کیمپس کے فوکل پرسن ڈاکٹر غلام سرور گچل، پروفیسر ڈاکٹر منیرالدین سومرو، پروفیسر ڈاکٹر عبداللہ دایو، پروفیسر ڈاکٹر نگینہ پروین، عبداللطیف سومرو، ڈاکٹر فدا حسین چانڈیو و دیگر نے شرکت کی۔