کوئٹہ:(پیر:2020-10-26) وزیراعلیٰ بلوچستان جام کمال کا دوبارہ کورونا ٹیسٹ مثبت آگیا ہے، ان کا دو ہفتے قبل کورونا ٹیسٹ مثبت آیا تھا جس کے بعد انہوں ںے خود کو قرنطینہ کرلیا تھا۔

دو ہفتے قبل 13 اکتوبر 2020 کو سماجی رابطے کی ویب سائٹ ’ٹوئٹر‘ پر اپنے جاری کردہ پیغام میں انہوں نے بتایا تھا کہ ان کا کورونا ٹیسٹ مثبت آگیا ہے، کورونا ٹیسٹ مثبت آنے کے بعد انہوں نے خود کو قرنطینہ کرلیا ہے۔

وزیراعلیٰ بلوچستان نے عوام الناس سے اپیل کی ہے کہ وہ کورونا وائرس سے بچاؤ کے لیے جاری کردہ احتیاطی تدابیر پر عمل درآمد یقینی بنائیں۔

وزیراعظم عمران خان نے کچھ دن قبل اپنی ٹوئٹ میں پاکستان میں کورونا کی دوسری لہر پھیلنے کا خدشہ ظاہر کرتے ہوئے کہا تھا کہ دوسرے ممالک کی نسبت اللہ کے کرم سے پاکستان میں کورونا کم پھیلا لیکن سردیوں میں کورونا کی دوسری لہر آسکتی ہے۔

انہوں نے کہا تھا کہ عوامی مقامات پر ہر کوئی ماسک پہنے، تمام دفاتر اور تعلیمی اداروں میں ماسک کا استعمال یقینی بنایا جائے۔00