خبر موجب سنڌ زرعي يونيورسٽي ٽنڊوڄام جي اڪيڊمڪ ڪائونسل جو آن لائين اجلاس وائيس چانسلر ڊاڪٽر ظهير الدين ميراڻي جي صدارت هيٺ ٿي گذريو. اجلاس ۾ ڪورونا سبب مارچ 2020 کان آن لائين هلايل تدريسي عمل، ڪلاس توڙي امتحانن بابت کنيل قدمن جي رپورٽ جي منظوري ڏني وئي.

اجلاس ۾ زرعي يونيورسٽي ۽ ان سان لاڳاپيل شهيد ذوالفقار علي ڀٽو زرعي ڪاليج ڏوڪري، خيرپور ڪاليج آف ايگريڪلچرل انجنيئرنگ ۽ سب ڪئمپس عمرڪوٽ ۾ تدريسي سال 21_2020 جي انڊر گريجوئيٽ پروگرام تحت نئين داخلا پاليسي بابت منظوري ڏني ويئي.

ڪورونا خدشن سبب صرف هن سال انٽري ٽيسٽ وٺڻ بجاءِ مئٽرڪ ۽ انٽر جي قابليت جي بنياد تي داخلا ڏني ويندي. اهڙي ريت 23 نومبر کان ٿيندڙ امتحان مرحليوار ورتا ويندا، پهرين مرحلي ۾ ٿرڊ ايئر ۽ فائنل جي شاگردن جا امتحان ورتا ويندا. بعد ۾ پهرين ۽ ٻئين سال جي شاگردن کي هاسٽلن ۾ گهرائي انهن جا امتحان شيڊيول موجب ورتا ويندا.

هوڏانهن اڪيڊمڪ ڪائونسل يونيورسٽي جي عمرڪوٽ سب ڪئمپس ۾ هن سال کان بي ايس آئي ٽي پروگرام شروع ڪرڻ جي منظوري ڏني، جنهن لاءِ 100 سيٽون به رکيون ويون آهن.

اجلاس ۾ مختلف فيڪلٽين جا ڊينز ڪاليجن جا پرنسپال، ڊائريڪٽر، رجسٽرار ۽ وائيس چانسلر جو تدريسي معاملن جو صلاحڪار ۽ مختلف شعبن جا چيئرمين پڻ موجود هئا.