جيڪب آباد:ارڙي تي ضابطو نه آيو،وڌيڪ هڪ ٻار فوت، انگ پنڌرهن ٿي ويو
جيڪب آباد(رپورٽ: عبدالنبي مگسي) جيڪب آباد ۾ ارڙي وبا تي ضابطو نه اچي سگهيو آهي، ڳوٺ آدم خان پنهور واسي ممتاز جو 3 ورھين جو ٻار شاھن ارڙي مرض سبب سول اسپتال ۾ فوت ٿي ويو جنهن بعد ضلعي ۾ ارڙي وبا سبب فوت ٿيندڙ ٻارن جو انگ 15 کان وڌي ويو آهي جڏهن ته ڊي ايڇ او جيڪب آباد ڊاڪٽر عبدالغفار رند 7 ٻارن جي ارڙي سبب فوت ٿيڻ جي تصديق ڪئي آهي، جيڪب آباد ضلعي ۾ ارڙي وبا جي ڦھلجڻ جو صوبائي وزير صحت 20 ڏينهن اڳ نوٽيس ورتو هو جنهن بعد ڊائريڪٽر صحت جيڪب آباد پھچي ٺل، ڳڙهي خيرو ۽ جيڪب آباد ۾ ارڙي وبا جي علائقن جو دورو پڻ ڪيو ھو جنھن بعد ڊپٽي ڪمشنر جيڪب آباد جي آفيس ۾ ضلعي عملدارن سان اجلاس ڪوٺائي ارڙي وبا تي ضابطو آڻڻ لاءِ سخت حڪم ڏنا ھئا پر ان باوجود به ضلعي ۾ ارڙي وبا ٻارن لاءِ ڏائڻ بڻيل آهي.
ان سلسلي ۾ ڊي ايڇ او جيڪب آباد ڊاڪٽر عبدالغفار رند رابطو ڪرڻ تي ٻڌايو ته ضلعي ۾ ارڙي مرض سبب فوت ٿيل ٻارڙن جو انگ ست آهي، ھر ٻار جي فوتگي ارڙي سبب نه ٿي رهي آهي، ارڙي وبا تي ضابطو آڻڻ لاءِ ڪوششون جاري آهن.
تازه ترين