ڪروڙين دلين تي حڪمراني ڪندڙ ليجنڊ اداڪار دليپ ڪمار لاڏاڻو ڪري ويو
ممبئي: (اربع 07 جولاءِ 2021ع) ڪروڙين دلين تي حڪمراني ڪندڙ ليجنڊ اداڪار ۽ بالي ووڊ جو بادشاهه دليپ ڪمار 98 سالن جي عمر ۾ لاڏاڻو ڪري ويو.
ڀارتي ميڊيا موجب ليجنڊ اداڪار يوسف خان عرف دليپ ڪمار کي گذريل هفتي ساهه ۾ تڪليف سبب ممبئي جي اسپتال ۾ داخل ڪيو ويو ۽ ان اسپتال ۾ هن پنهنجي زندگي جا آخري ساهه کنيا. دليپ ڪمار کي گذريل مهيني ٻه ڀيرا ساهه ۾ تڪليف سبب اسپتال منتقل ڪيو ويو هو. گذريل مهيني 8 جون تي دليپ ڪمار کي ممبئي جي بندوجا اسپتال منتقل ڪيو ويو هو جتي ان جي حالت بهتر ٿيڻ کان پوءِ ان جا گهر ڀاتي کيس 11 جون تي گهر واپس کڻي آيا هئا پر ان جي حالت هڪ دفعو بيهر خراب ٿيڻ تي کيس گذريل اربع 30 جون تي ٻيهر ممبئي جي هندوجا اسپتال داخل ڪيو ويو هو جتي هو ڊاڪٽرن جي نگراني هيٺ(آءِ سي يو) وارڊ ۾ هو. ڀارتي ميڊيا موجب دليپ ڪمار اربع جي صبح 7:30 منٽن تي ممبئي جي کهار بندوجا اسپتال ۾ پنهنجي زندگي جا آخري ساهه کنيا.
پشاور جي محلي خداداد ۾ يوسف خان جي نالي سان پيدا ٿيندڙ دليپ ڪمار 1944ع ۾ فلم(جواريهانا) کان اداڪاري جي شروعات ڪئي. تقريبن 5 ڏهاڪن کان بالي ووڊ تي حڪمراني ڪندڙ 86 کان وڌيڪ فلمن ۾ ڪم ڪيو. هو پنهنجي دور ۾ رومينٽنڪ هيرو جي طور تي سڃاتو ويندو هو. فلم سنگ دل، امر، اڙن کهٽولا، آن، انداز، نيا دور، مدهومتي، يهودي، مغل اعظم ۽ ديوداس جهڙيون ڪجهه فلمون آهن جن ۾ ڪم ڪرڻ سبب کيس شهنشاهه جذبات جو خطاب ڏنو ويو. پر هن فلم ڪوهه نور، آزاد، گنگا جمنا، رام ۽ شيام ۾ ڪم ڪري اهو ثابت ڪيو ته هو ماڻهن کي کلائڻ جو فن به ڄاڻندو هو. دليپ ڪمار کي 1994ع ۾ ڀارتي فلم انڊسٽري جي سڀني کان وڏي اعزاز دادا صاحب پهالڪي ايوارڊ سان نوازيو ويو. ان کان علاوه 2015 ۾ کيس ڀارت جو ٻيو سڀني کان وڏو شهري اعزا پدم وي بهوشن ڏنو ويو.
تازه ترين