رياض: ڇنڇر 20 جولاءِ 2019ع: سعودي بادشاهه شاهه سلمان سعودي عرب ۾ آمريڪي فوج جي مقرري جي منظوري ڏئي ڇڏي.
پرڏيهي خابرو اداري موجب سعودي بادشاهه شاهه سلمان خطي ۾ سيڪيورٽي ۽ استحڪام کي هٿي ڏيڻ لاءِ سعودي عرب ۾ آمريڪي فوج جي مقرري جي منظوري ڏئي.
آمريڪي دفاعي کاتي به سعودي عرب ۾ آمريڪي فوج جي مقرري جي تصديق ڪندي چيو آهي ته آمريڪا اڀرندڙ سنگين خطري کي روڪڻ لاءِ سعودي عرب ۾ پنهنجا وسيلا ۽ فوجي دستن کي مقرر ڪندو.
رائٽرز موجب آمريڪي دفاعي کاتي جي اختيارين جو چوڻ آهي ته سعودي عرب ۾ آمريڪي فوج جي مقرري جو مقصد خطي ۾ امن ۽ استحڪام برقرار رکڻ ۽ دفاعي شعبي ۾ گڏيل تعاون کي وڌائڻ آهي.
آمريڪي اختيارين جو چوڻ آهي ته سعودي عرب ۾ 500 فوجين جي مقرري گذريل مهيني پينٽاگون طرفان وچ اوڀر ۾ مقرر آمريڪي فوجين جي تعداد ۾ واڌ جي اعلان جو حصو آهي.
گزريل مهيني پينٽاگون وچ اوڀر ۾ هڪ هزار فوجين جي مقرري جو اعلان ڪيو هو جڏهن ته اهو نه ٻڌايو ويو ته اهي فوجي ڪٿي ڪٿي مقرر ٿيندا.
2003ع کانپوءِ اهو پهريون موقعو آهي جو سعودي عرب ۾ آمريڪي فوجي مقرر ڪيا پيا وڃن، آمريڪا 2003ع ۾ عراق جنگ جي خاتمي تي سعودي عرب مان سمورا فوجي واپس گهري ورتا هئا.