کوئٹہ: (جمعرات:2021-01-07) پاکستان مسلم لیگ ن کی نائب صدر مریم نواز  نے کہنا ہے کہ مچھ واقعہ انتہائی افسوسناک اوردل دہلا دینے والا واقعہ ہے۔  

تفصیلات کے مطابق سانحہ مچھ کے شہدا کے لواحقین کے دھرنے سے خطاب کرتے ہوئے مریم نواز نے کہا کہ وزیراعظم عمران خان کو سخت سردی میں بیٹھے ورثا کے سروں پر ہاتھ رکھنا چاہیے۔ 

مریم نواز شریف نے وزیر اعظم کو مخاطب کرتے ہوئے کہا کہ عمران خان آپ کو وزارت عظمیٰ کی کرسی پر بٹھا دیا گیا مگر آپ کو قوم کا احساس نہیں۔ 

مسلم لیگ ن کی نائب صدر کہا کہ ورثا سے استدعا کرتی پوں کہ اپنے پیاروں کی تدفین کریں۔ 

مریم نواز نے کہا کہ سانحہ مچھ پر نواز شریف اور پارٹی کی طرف سے تعزیت کرتی ہوں، ہزارہ بھائیوں کےغم میں برابر کے شریک ہیں، میرے پاس الفاظ نہیں کہ کس طرح اس دکھ کو بیان کروں۔ 

مسلم لیگ کی رہنما نے کہا کہ غریب کان کنوں کو بے دردی سے شہید کیا گیا، ہم اس تکلیف کا احساس نہیں کر سکتے جو آپ پر گزری ہے، پوری قوم ہزارہ برادری کے ساتھ کھڑی ہے۔

انہوں نے مزید کہا کہ ہزارہ برادری کے 2 ہزارسے زائد شہدا ہیں۔ 

مریم نواز کا کہنا تھا کہ آپ ایک بےحس شخص کو پکار رہے ہیں لیکن ان کے پاس آپ کیلئے وقت نہیں ہے۔ 

انہوں نے وزیر اعظم عمران خان کو مخاطب کرتے ہوئے کہا کہ سیاسی اختلافات بھلا کرکہنا چاہتی ہوں کہ یہاں آئیں،  یہ لوگ لاشیں رکھ کرآپ کے منتظر ہیں، یہ آپ سے کچھ نہیں چاہتے صرف آپ آئیں ان کے سروں پردست شفقت رکھیں۔ 

مسلم لیگ ن کی نائب صدر کا کہنا تھا کہ مجھے پتہ ہے آپ تنقید کی وجہ سےنہیں آ رہے، آپ کا فرض ہے یہاں آئیں ان لوگوں کاغم بانٹیں۔  ان کا کہنا تھا کہ جھےاقتدارکی کرسی پر بیٹھے شخص پر بہت افسوس ہے، ہزارہ برادری نے ہمیشہ اس دھرتی سے محبت کی ہے۔