کراچی:(جمعرات:2021-01-14) کراچی میں پولیس اور حساس اداروں نے مشترکہ کاروائی کرتے ہوئے بھارتی خفیہ ایجنسی کا حمایت یافتہ خطرناک دہشت گرد گرفتار کرلیا ہے۔

تفصیلات کے مطابق کراچی کے علاقے اتحاد ٹاؤن میں پولیس اور حساس اداروں نے خفیہ اطلاعات ملنے پر کارروائی کی اور بھارتی خفیہ ایجنسی کے حمایت یافتہ خطرناک دہشت گرد کو گرفتار کرلیا۔

پولیس کے مطابق گرفتار دہشت گرد کا نام منصور عرف انیل ہے، اس نے بھارت سے دہشت گردی کی تربیت حاصل کررکھی ہے اور اس کا تعلق علیحدگی پسند تحریک سے ہے۔

پولیس نے مزید بتایا کہ گرفتار دہشت گرد منصور سی پیک منصوبوں، حساس تنصیبات اور گیس پائپ لائن پر حملوں سمیت دہشت گردی کی مختلف وارداتوں میں ملوث ہے۔

اس کے علاوہ ملزم حساس تنصیبات کی ریکی اور دھماکا خیزمواد کی ترسیل بھی کرتا تھا، گرفتار ملزم سے ایک کلو دھماکا خیز مواد، بارودی سرنگ اور اسلحہ برآمد ہوا ہے۔00