اسلام آباد:(جمعہ:2021-02-26) وزیر خارجہ شاہ محمود قریشی کی عراق کے وزیر دفاع جمعہ عناد سعدون الجبوری سے ملاقات کی ہے۔

تفصیلات کے مطابق عراق کے وزیر دفاع جمعہ عناد سعدون الجبوری نے وزیر خارجہ شاہ محمود قریشی سے ملاقات کی ہے جس میں دو طرفہ تعلقات، علاقائی سلامتی سمیت باہمی دلچسپی کے امور پر تبادلہ خیال کیا گیا۔

وزرات خارجہ میں ہونے والی ملاقات میں وفاقی وزیر برائے دفاعی پیداوار زبیدہ جلال بھی موجود تھیں۔

دونوں رہنماؤں نے خطے میں سیکیورٹی اور استحکام کیلئے مل کر کام کرنے کے عزم کا اظہار کیا، عراق کے وزیر دفاع نے خطہ میں امن اور استحکام کیلئے پاکستانی کی مسلسل کوششوں کو سراہا۔

اس موقع پر وزیر خارجہ شاہ محمود قریشی نے کہا کہ پاکستان اور عراق کے مابین گہرے دو طرفہ برادرانہ مراسم ہیں، پاکستان عراق کے ساتھ اپنے دو طرفہ تعلقات کو بہت اہمیت دیتا ہے اور انہیں مزید مستحکم بنانے کا خواہاں ہے۔00