اسلام آباد:(اتوار:2021-02-28) چیئرمین پاکستان پیپلزپارٹی بلاول بھٹو زرداری نے کہا ہے کہ ضمنی انتخابات میں حکومت کو شکست دی کیونکہ عوام حکومت کے ساتھ نہیں ہیں بلکہ پی ڈی ایم کے ساتھ ہیں۔

پی ڈی ایم کے سربراہ مولانا فضل الرحمان کے ساتھ ملاقات کے بعد میڈیا سے گفتگو کرتے ہوئے چیئرمین پاکستان پیپلزپارٹی بلاول بھٹو زرداری نے دعویٰ کیا کہ اراکین پارلیمنٹ بھی حکومت کے ساتھ نہیں پی ڈی ایم کے ساتھ ہیں۔

چیئرمین پی پی بلاول بھٹو زرداری نے کہا کہ وفاقی حکومت نے کراچی کو لاوارث چھوڑ دیا ہے، ایم کیو ایم کو چاہیے کہ پی ڈی ایم میں شامل ہو کر کراچی کے حقوق کے لیے آواز اٹھائے۔

بلاول بھٹو زرداری نے کہا کہ یوسف رضا گیلانی پی ڈی ایم کے متفقہ امیدار ہیں، امید ہے کہ سینیٹ الیکشن میں ہمارے امیدوار سرپرائزنگ نتائج لائیں گے، پی ڈی ایم نے حکومت کو ہر میدان میں چیلنج کیا ہے، موجودہ حکومت کو گھر بھیجنے میں کامیاب ہوں گے۔

اس موقع پر پی ڈی ایم کے سربراہ مولانا فضل الرحمان نے میڈیا سے بات چیت کرتے ہوئے کہا کہ وہ بلاول بھٹو، سید یوسف رضا گیلانی اور فرحت اللہ بابر کی آمد پر ان کے شکر گزار ہیں۔

امیر جے یو آئی (ف) مولانا فضل الرحمان نے کہا کہ اسلام آباد میں ہمارے تین لوگوں کو شہید کیا گیا۔

میڈیا بریفنگ میں سربراہ پی ڈی ایم مولانا فضل الرحمان نے کہا کہ سینیٹ الیکشن کے فوری بعد پی ڈی ایم کے سربراہی اجلاس ہوں گے، سینیٹ انتخابات کے بعد مستقبل کی حکمت عملی وضع کی جائے گی۔

مولانا فضل الرحمان نے کہا کہ پی ڈی ایم انتخابی اتحاد نہیں بلکہ تحریک کا نام ہے، موجودہ حکمرانوں سے جان چھڑوانا عوام کی خدمت ہوگی۔00