نئے چیئرمین نیب کی تعیناتی کا معاملہ، صدر مملکت رواں ہفتے مشاورت شروع کریں گے
اسلام آباد:(اربع 03 نومبر 2021ع) صدر مملکت عارف علوی رواں ہفتے نئے چیئرمین نیب کی تعیناتی سے متعلق مشاورت شروع کریں گے تاہم نئے چیئرمین کے نام پر اتفاق تک موجودہ چیئرمین نیب کام جاری رکھیں گے۔ تفصیلات کے مطابق نئے چیئرمین نیب کی تعیناتی کے معاملے پر صدر مملکت عارف علوی رواں ہفتے مشاورت شروع کریں گے، ذرائع کا کہنا ہے کہ صدر پہلے وزیراعظم سے چیئرمین نیب کے لیے نام طلب کریں گے، جس کے بعد وزیراعظم کی جانب سے چیئرمین نیب کے موصول نام اپوزیشن لیڈرکو بھیجیں گے۔
ذرائع نے مزید کہا ہے کہ نئے چیئرمین کے نام پر اتفاق تک موجودہ چیئرمین نیب کام جاری رکھیں گے۔
یاد رہے یکم نومبر کو صدر پاکستان عارف علوی کی منظوری کے بعد تیسرا نیب ترمیمی آرڈیننس جاری کیا گیا تھا ، نئے نیب آرڈیننس میں چیئرمین نیب کو ہٹانے کا اختیارسپریم جوڈیشل کونسل سے واپس لے لیا تھا اور کہا تھا کہ چیئرمین نیب کو ہٹانے کا فورم صدرمملکت ہوں گے۔
آرڈیننس کے تحت عوام الناس سے دھوکہ اور فراڈ کیسز واپس نیب کے حوالے کر دیے گئے اور مضاربہ کیسز، فراڈ اور دھوکہ دہی کے کیسز کو 6 اکتوبر سے پہلے کی پوزیشن پر بحال کردیا گیا ہے، جس کے بعد نیب اور احتساب عدالتوں کو فراڈ کیسز پر کاروائی کا اختیار دے دیا گیا تھا۔
حالیہ خبریں
