news-details
کراچی

بلدیاتی نظام کے خلاف اپوزیشن نے سندھ حکومت کو ٹف ٹائم دینے کے لئے کمر کس لی

کراچی:(بدھ: 22 دسمبر 2021) سندھ کے بلدیاتی نظام کے خلاف اپوزیشن نے فیصلہ کن مرحلے شروع کرنے کا فیصلہ کیا ہے۔ تفصیلات کے مطابق سندھ کے مجوزہ بلدیاتی نظام کے خلاف اپوزیشن نے وزیراعلیٰ ہاؤس کے باہر دھرنا دینے پر غور شروع کردیا ہے، دھرنے کے لئے پاکستان تحریک انصاف سندھ کے اہم رہنما سرگرم ہوگئے ہیں اور انہوں نے اپوزیشن جماعتوں سے مشاورت شروع کردی ہے۔
ذرائع کا کہنا ہے کہ گورنر ہاؤس میں پی ٹی آئی کی ایم کیوایم اور پی ایس پی رہنماؤں سے ملاقاتوں میں مشاورت ہوئی ہے، جہاں وزیراعلیٰ ہاؤس پر دھرنا دینے سےمتعلق تجاویز کو متحدہ پاکستان کے سامنے رکھ دیا گیا ساتھ ہی پاک سرزمین پارٹی سے بھی اس معاملے پر مشاورت کی گئی ہے۔
ذرائع کا کہنا ہے کہ دھرنے کا حتمی فیصلہ جی ڈی اے کو اعتماد میں لینے کے بعد کیاجائےگا۔ دوسری جانب گورنر سندھ عمران اسمٰعیل نے متعدد اعتراض لگا کر سندھ لوکل گورنمنٹ (ترمیمی) بل 2021 منظور کرنے سے انکار کردیا اور نظرِ ثانی کے لیے دوبارہ سندھ اسمبلی بھجوا دیا ہے۔
گورنر سندھ کا کہنا تھا کہ یہ بل جمہوریت کی روح کے منافی ہے اور بلدیاتی حکومتوں سے ہر اختیار اور طاقت لے کر انہیں صوبائی حکومت کے ماتحت کردے گا جبکہ ہر وہ ذریعہ بھی بند کردے گا جس سے بلدیاتی نمائندوں کے لیے وسائل پیدا ہوتے ہیں، ایک جمہوری جماعت یا نظام بلدیاتی حکومت کے لیے اس طرح کے ماڈل کی کس طرح اجازت دے سکتی ہے؟