news-details
کراچی

کراچی میں تیز ہواؤں نے تباہی مچا دی، دیواریں گرنے سمیت مختلف حادثات میں چار افراد جاں بحق

کراچی:(جمعہ 21 جنوري 2022ع) کراچی میں تیز ہواؤں نے تباہی مچا دی، دیواریں گرنے سمیت مختلف حادثات میں چار افراد جاں بحق، چھ زخمی ہو گئے۔ نارتھ ناظم آباد میں دیوار گرنے سے ایک شخص جب کہ گلبائی اور گلشن معمار میں بھی دیواریں گرنے سے 2 افراد جاں بحق ہو گئے ہیں۔
دوسری جانب بلدیہ اسپارکو روڈ کے قریب مکان کی چھت گرنے سے 3 افراد زخمی ہوئے جب کہ ناردرن بائی پاس پر تیز ہوا کے باعث موٹر سائیکل سلپ ہونے سے 2 افراد زخمی ہو گئے ہیں۔ اورنگی ٹاون سیکٹر بارہ میں بجلی کا پول گرنے سے ایک شخص جب کہ اورنگی راجہ تنویر کالونی میں دیوار گرنے سے بچہ زخمی ہو گیا ہے۔ تیز ہواؤں سے جماعت اسلامی کے دھرنے کے ٹینٹ، بینرز، لائٹس دور جا گریں۔
محکمہ موسمیات نے کہا ہے کہ تیز اور گرد آلود ہوائیں چلنے کا سلسلہ آج رات تک جاری رہ سکتا ہے، ہواؤں کی رفتار 45 کلومیٹر فی گھنٹہ تک ریکارڈ ہورہی ہیں تاہم کچھ وقت کے لیے ہواؤں کی رفتار 60 کلومیٹر فی گھنٹہ بھی ریکارڈ ہوئی.