شریف فیملی پر 40 سے 45 ارب روپے کے 16 مقدمات چل رہے ہیں، عمران خان نے شریف خاندان کے خلاف کیسز پر وائٹ پیپر جاری کر دیا
اسلام آباد:(اتوار 01 مئي 2022ع) سابق وزیراعظم عمران خان نے شریف خاندان کے خلاف کیسز پر وائٹ پیپر جاری کر دیا۔ کہتے ہیں ن لیگ کو این آر او 2 ملنا شروع ہو گیا۔ اسلام آباد میں پریس کانفرنس سے خطاب کرتے ہوئے چیئرمین تحریک انصاف عمران خان نے کہا ہے کہ شریف فیملی پر 40 سے 45 ارب روپے کے 16 مقدمات چل رہے ہیں ، سارے کیسز ہمارے دور سے پہلے کے ہیں، صرف مقصود چپڑاسی والا کیس پی ٹی آئی دور میں بنا، ن لیگ اورپیپلزپارٹی کی حکومتوں کو دو دو بار کرپشن پر نکالا گیا، نون لیگ اب اپنے مقدمات ختم کرے گی۔
انہوں نے کہا کہ شہبازشریف نے آتے ہی تفتیشی افسران تبدیل کئے، خطرہ ہے ان کے مقدمات کا ریکارڈ غائب کردیا جائے گا۔ ان کی لوٹ مار کی وجہ سے ملک خسارے میں چلا گیا۔ یہ وہ خاندان ہیں جو 30 سال سے ملک کو لوٹ رہے ہیں۔ سازش سے حکومت گرانے پر عوام میں غم و غصہ ہے، یہ جہاں بھی جائیں گے عوام ان پر اپنا غصہ اتاریں گے، شیخ رشید کے بھتیجے کی گرفتاری افسوس ناک اقدام ہے۔ عمران خان نے مزید کہا کہ یوسف رضا گیلانی نے قوانین میں نرمی کی، آصف زرداری نے توشہ خانہ سے تین بلٹ پروف گاڑیاں نکلوائیں، نوازشریف نے دس سال بعد ایک گاڑی کو قانونی کرا دیا، یہ نیب کا کیس ہے، اب پھر یہ دونوں پارٹیاں مل کر ملک کو لوٹیں گی، ان کو اندازہ نہیں لوگوں کو ان پرکتنا غصہ ہے۔
دوسری جانب سابق وزیر داخلہ شیخ رشید نے پریس کانفرنس سے خطاب کرتے ہوئے کہا کہ نون لیگ نے آتے ہی 300 لوگوں کے نام ای سی ایل سے نکالے۔ رانا ثنا اجرتی قاتل ہے۔ عابد شیر علی کے والد کہتے ہیں رانا ثنا نے 18 قتل کئے ہیں۔ یہ مجھے بھی قتل کرنا چاہتے ہیں، میری جان کو خطرہ ہے، تھانہ سیکرٹریٹ میں 7 لوگوں کے نام لکھ کر دے دیئے۔ ان کا کہنا تھا کہ مئی کا مہینہ خطرناک اور خوفناک ہے۔ ملک کے خلاف سازش کی جا رہی ہے۔ ملک کے اہم لوگوں کو درخواست دے دی۔ جیل میرا سسرال اور ہتھکڑی میرا زیور ہے، ضمانت قبل از گرفتاری نہیں کروا رہا۔
حالیہ خبریں
