news-details

پاکستان میں ایک بار پھر دو عیدیں، خیبر پختونخوا میں آج عیدالفطر منائی جا رہی ہے

پشاور:(پير 02 مئي 2022ع) پاکستان میں ایک بار پھر دو عیدیں ہو گئیں، خیبر پختونخوا میں سرکاری سطح پر آج عیدالفظرمنائی جائی رہی ہے، پشاور میں سو سے زائد نماز عید کے اجتماعات ہوئے۔ وزیر اعلیٰ خیبر پی کے محمود خان نے گورنر ہاؤس پشاور میں نمازعید ادا کی. عید کا بڑا اجتماع چارسدہ روڈ پر واقع عید گاہ میں ہوا جہاں صوبائی وزرا ، سرکاری افسران سمیت شہریوں کی کثیر تعداد نے نماز عید ادا کی۔ اس موقع پر سکیورٹی کے سخت انتظامات کئے گئے تھے۔ نماز عید کے بعد ملک کی سلامتی و استحکام کی دعائیں مانگی گئیں۔ پشاور کی دیگر مساجد میں بھی عید کے بڑے اجتماعات ہوئے۔
ہزارہ ڈویژن میں کوئی شہادت نہیں ملی۔ قائم مقام گورنر مشتاق غنی کہتے ہیں مرکزی کمیٹی کے اعلان پر منگل کو ہی عید منائیں گے۔ دوسری جانب معاون خصوصی برائے اطلاعات بیرسٹر محمد علی سیف کا شوال المکرم کے چاند سے متعلق بیان میں کہنا تھا کہ خیبرپختونخوا کے مختلف علاقوں سے عید کا چاند دیکھنے کی 130 شہادتیں موصول ہوئیں لہذا خیبرپختونخوا حکومت نے آج صوبے بھر میں سرکاری طور پر عید الفطر منانے کا فیصلہ کیا ہے۔
سعودی عرب، یو اے ای، لبنان، فلسطین میں بھی عید آج منائی جا رہی ہے، مسجد الحرام اور مسجد نبوی ﷺ میں نماز عید ادا کر دی گئی۔ ملائیشیا، فلپائن، برونائی اور ہانگ کانگ میں نماز عید کے اجتماعات منعقد ہوئے۔ بھارت، بنگلہ دیش، سری لنکا میں چاند نظر نہیں آیا، عید کل منائی جائے گی۔ پاکستان کے دیگر صوبوں میں عید الفطرکل 3 مئی بروز منگل کو ہوگی، چیئرمین مرکزی رویت ہلال کمیٹی مولانا عبدالخبیر آزاد کی زیر صدارت گذشتہ روز اسلام آباد میں اجلاس ہوا۔ اجلاس کے بعد پریس کانفرنس کرتے ہوئے عبدالخبیر آزاد نے کہا کہ پاکستان کے کسی مقام سے شوال کے چاند نظر آنے کی شہادت موصول نہیں ہوئی۔ قبل ازیں لاہور اور کراچی اور کوئٹہ میں زونل رویت ہلال کمیٹی کے اجلاس ہوئے، زونل کمیٹیوں کی جانب سے اعلان کیا گیا کہ پنجاب ، سندھ اور بلوچستان میں شوال کا چاند نظر نہیں آیا۔