news-details
لاہور

وزیر اعلیٰ پنجاب حمزہ شہباز نے صوبے میں مہنگائی کو کنٹرول کرنے کے لیے اہم فیصلہ کر لیا

لاہور:(منگل: 10 مئي 2022ع) وزیراعلیٰ پنجاب حمزہ شہباز عوام کو مہنگائی سے ریلیف دینے کے لیے متحرک ہو گئے۔ مہنگائی کو کنٹرول کرنے کے لیے اہم فیصلہ وزیر اعلیٰ نے پنجاب میں ڈسٹرکٹ پرائس کنٹرول کمیٹیوں کو ازسر نو فعال کرنے کا فیصلہ کر لیا۔
حمزہ شہباز نے ہدایت کی کہ فوری طور پر پرائس کنٹرول کمیٹیوں کو نوٹیفائی کر کے متحرک کیا جائے جبکہ شوگر، فلور، گھی اور پولٹری ایسوسی ایشنز سے مذاکرات کر کے قیمتوں میں کمی لائی جائے اور گھی، آٹے، چینی، چکن و دیگر اشیا کی قیمتیں کم کرنے کے لیے جامع ایکشن پلان بنایا جائے۔ انہوں نے کہا کہ قابل عمل پلان کو جلد حتمی شکل دی جائے اور دکانوں پر اشیا کی فہرستیں نمایاں جگہوں پرآویزاں کی جائیں۔ ہمارا فوکس عام آدمی کو ریلیف فراہم کرنا ہے جبکہ اگلے 24 گھنٹے میں پرائس کنٹرول کے لیے مربوط پالیسی کو حتمی شکل دی جائے۔
وزیر اعلیٰ پنجاب نے کہا کہ مہنگائی کے باعث عام آدمی کا کوئی پرسان حال نہیں اور سابق حکومت کی غلط پالیسیوں کے باعث سفید پوش طبقہ مہنگائی کی چکی میں پس کررہ گیا ہے تاہم ہماری حکومت نے عوام کو مہنگائی سے ہر صورت ریلیف دینا ہے۔ انہوں نے کہا کہ مارکیٹ کمیٹیوں کو بھی ازسر نو فعال کیا جائے گا اور صوبے میں کسی کو ناجائز منافع خوری کی اجازت نہیں دیں گے۔ ذخیرہ اندوزوں اور ناجائز منافع خوروں کے خلاف بلاتفریق کارروائی ہو گی۔