مجھے کچھ بھی ہوا تو اسکے ذمہ دار نانا پاٹیکر اور ان کے دوست ہونگے:تنوشری دتا

news-details

بالی وڈ اداکارہ تنوشری دتا کا کہنا ہے کہ ان کی جان کو خطرہ ہے اور اگر انہیں کچھ بھی ہوا تو اس کے ذمہ دار اداکار نانا پاٹیکر اور بالی وڈ مافیا میں موجود ان کے دوست ہوں گے۔

اداکارہ نے انسٹاگرام پر ایک پوسٹ شیئر کی جس میں انہوں نے لکھا کہ 'اگر میرے ساتھ کبھی کچھ ہوتا ہے تو مجھے ہراساں کرنے والے ملزم نانا پاٹیکر، ان کے وکیل اوربالی وڈ مافیا کے ان کے دوست ذمہ دار ہوں گے'۔

تنوشری نے لکھا 'بالی ووڈ مافیا کون ہے؟ یہ وہی لوگ ہیں، جن کے نام آنجہانی اداکار سشانت سنگھ راجپوت کی موت کے معاملے میں اکثر آتے تھے'۔

انہوں نے سوشل میڈیا صارفین سے کہا 'ان لوگوں کی فلمیں نہ دیکھیں، ان کا مکمل بائیکاٹ کریں، انڈسٹری کے ان اداکاروں اور صحافیوں کے پیچھے لگ جائیں، جنہوں نے میرے بارے میں جھوٹی خبریں پھیلائیں'۔

تنوشری نے لکھا 'ان لوگوں نے مجھے بے حد ہراساں کیا ہے، ہمارے ملک کا قانون اور عدلیہ ناکام ہوچکی ہے لیکن مجھے اپنے لوگوں پر مکمل بھروسہ ہے'۔

واضح رہے کہ اداکارہ تنوشری دتا نے 2018 میں اداکار نانا پاٹیکر، کوریوگرافر گنیش آچاریا اور فلم ساز ویویک اگنی ہوتری پر فلم کی شوٹنگ کے دوران جنسی ہراسانی کا الزام عائد کیا تھا۔