آئی ایم ایف معاہدہ کے اثرات:سٹاک مارکیٹ میں غیر معمولی تیزی سے تاریخ رقم

news-details

کراچی: (پير: 03 جولائی 2023ء) عالمی مالیاتی فنڈ (آئی ایم ایف ) سے ڈیل ہونے کے بعد سرمایہ کاروں کا اعتماد بحال ہونے لگا، مارکیٹ کھلتے ہی سٹاک مارکیٹ میں زبردست تیزی دیکھی گئی۔ ڈیفالٹ کا خطرہ ٹلنے کے بعد عید الاضحیٰ کی تعطیلات ختم ہوتے ہی ہفتے کے پہلے دن کاروبار شروع ہوتے ہی نئی تاریخ رقم ہو گئی۔ عیدالاضحیٰ کی چھٹیوں کے بعد کاروباری ہفتے کے پہلے روز سٹاک مارکیٹ میں کاروبار کے آغاز پر تیزی دیکھی گئی ہے، غیر معمولی تیزی کے بعد کاروبار کو ایک گھنٹے کیلئے روک دیا گیا تھا جسے دوبارہ بحال کر دیا گیا ہے۔

کاروبار کے دوران سٹاک مارکیٹ میں اتار چڑھاؤ کا سلسلہ جاری ہے، 2 ہزار 298 پوائنٹس اضافے کے بعد 100 انڈیکس 43 ہزار 750 پوائنٹس کی سطح پر ٹریڈ کر رہا ہے۔  قبل ازیں سٹاک مارکیٹ میں غیر معمولی تیزی کے باعث کاروبار کو ایک گھنٹے کیلئے روک دیا گیا تھا، 5 فی صد اپر کیپ میکانزم کی وجہ سے ٹریڈنگ روکی گئی، کیونکہ یہ قانون ہے کہ اگر 5 فیصد تک مارکیٹ میں کمی ہو یا بڑھے تو ایک گھنٹے کیلئے کاروبار معطل کیا جاتا ہے۔

حصص کی خرید و فروخت کے دوران ابتدا ہی میں کے ایس ای 100 انڈیکس 1961 پوائنٹس اضافے سے 43414 پوائنٹس پر ٹریڈ ہوا۔بعد ازاں 2341.68 پوائنٹس کے اضافے سے کے ایس ای 100 انڈیکس 43794.36 پوائنٹس پر ٹریڈ ہوا، جو بڑھتے بڑھتے  2471 پوائنٹس اضافے سے 43923 پوائنٹس تک پہنچ گیا۔ واضح رہے کہ اس سے قبل 11 اپریل 2022ء  کو انڈیکس میں 1700 پوائنٹس کے اضافے کوبلند ترین ریکارڈ قرار دیا گیا تھا۔

 واضح رہے کہ عالمی مالیاتی فنڈ (آئی ایم ایف) نے پاکستان اور آئی ایم ایف کے درمیان 3 ارب ڈالر کا معاہدہ طے پا گیا ہے،  جس کے بعد  بین الاقوامی مالیاتی فنڈ کی جانب سے اسٹاف لیول معاہدے کا اعلان بھی کیا جا چکا ہے۔ پاکستان کو آئی ایم ایف سے 3 ارب ڈالر کے قرض پروگرام کی ابتدائی منظوری مل گئی، جس کے نتیجے میں ڈیفالٹ کا خطرہ کم ہو گیا ہے۔ پاکستان اور آئی ایم ایف کے درمیان 3 ارب ڈالر مالیت کے اسٹینڈ بائی ارینجمنٹ کے معاہدے پر اتفاق ہوا ہے جب کہ آئی ایم ایف نے معاہدہ کی تصدیق کی ہے۔