بھارتی کمنٹیٹر نے ورلڈکپ میں شاہین کی پرفارمنس کو بابراعظم سے زیادہ اہم قرار دے دیا

news-details

نیو دہلی: (اتوار: 01 اکتوبر2023ء)بھارت کے معروف کمنٹیٹر ہرشا بھوگلے نے شاہین شاہ آفریدی کی پرفارمنس کو پاکستان کیلئے ورلڈکپ میں بابراعظم سے زیادہ اہم قرار دیتے ہوئے کہا کہ  شاہین آفریدی ابتدائی اوورز میں پاکستانی ٹیم کیلئے وکٹ ٹیکر بالر ہیں۔

کرکٹ ویب سائٹ کو دیئے گئے انٹرویو میں بھارتی کمنٹیٹر ہرشا بھوگلے نے بتایا کہ شاہین آفریدی ابتدائی اوورز میں پاکستانی ٹیم کیلئے وکٹ ٹیکر بالر ہیں، ایشیاکپ کے دوران دیکھا اگر فاسٹ بولر کو وکٹ نہ ملے تو پاکستان بیک فٹ پر آجاتا ہے جبکہ مڈل اوورز میں بھی پاکستان کے اسپنرز وکٹیں نہیں لے پارہے ہیں جس کا انہیں نقصان اُٹھانا پڑرہا ہے۔ ہرشا بھوگلے نے اوپنر فخر زمان کی خراب فارم کو دیکھتے ہوئے کہا کہ پاکستان کو امام الحق اور عبداللہ شفیق کیساتھ اوپننگ کیلئے جانا چاہیے تاہم کمنٹیٹر نے مڈل آرڈر اور اسپن بولنگ پر شکوک کا اظہار کیا۔

نسیم شاہ کی انجری کے حوالے سے ان کا کہنا تھا کہ ورلڈکپ کے اہم میچز کے دوران پاکستان فاسٹ بولر کی کمی کو بہت زیادہ محسوس کرے گا۔انہوں نے سوال کیا کہ سلمان آغا، افتخار احمد اور سعود شکیل اچھے کھلاڑی ہیں لیکن کیا آپ ورلڈکپ جیتنے کیلئے ان پر بھروسہ کرسکتے ہیں؟ یہ دیکھنا ہوگا۔

قبل ازیں جمعے کو نیوزی لینڈ کے خلاف پہلے وارم اَپ میچ میں پاکستان کو شکست کا منہ دیکھنا پڑا تھا۔ قومی ٹیم اپنا دوسرا وارم اَپ میچ آسٹریلیا کے خلاف 3 اکتوبر کو کھیلے گی۔واضح رہے کہ آئی سی سی ورلڈکپ کا آغاز 5 اکتوبر سے ہوگا، قومی ٹیم ایونٹ میں اپنا پہلا میچ نیدرلینڈز کیخلاف کھیلے گی۔